حَركَاشةَ الحنين الكَيّ
تَقاية البَرد و الصَيّ
يا مَفْدوعَة ... يا مَصْدوعَة ...
يا بِتَ الحَراز واللّي ...
رِسالة بَحَمِلِك ليها ... تَغُور في شنطتك تُوهَة
تَتَقِل في عَقاب سنين الغُربَة و الرُوقَة ..
أقِفْلي الباب ...
و افتحي لي غَرام الروح ضَرا و نَفاج ...
واسمعي للكلام المطرة و النُقَارة والفَرارة و مَدَك الطين ...
بوصيك ... ويا حليل وصية المفارق على بلد الصقيع و الزِيف ..
بوصيك ... وخلي كلامي ليك تَنور ... تلولي في نارو ما تطفي اللهيب الشوق ..
بوصيك ... وودعتك في حصن الله المنيع التُر و خاطر حرفك المدروش ...
بوصيك ... علي الدرب المسكتي عديل ... لا تِنحرفي ... لا تِنجرفي ... لا تِنجلدي .. لا تنسي العهود البَارقة ... لا تِنهدي ... يا مِسكِيتة ياخ هَدّي ...
بوصيك ... علي كل الحكاوي حنين ... علي البفرق مع الترحال ... وبتبدل مع السَرحة و ريحة الغربة شايلة الطَمْيّة و الدُعّاشة كُمشَة فال ...
بوصيك .... علي القهوة ... لاطفيها ... وغازليها و بي راحة روحك السمحة قَلِيها ... وحبة بُنّة في سَهوة ... تَقَلِّيها بي عبق ريحتك ... اعملي حسابة من حُرقَة ... ومايليها في هداوة روحك ... ومايلي معاها كل سَهوة ... و دقيها ... وخليها التدق جرس الحنين في فندق و صارحيها ... حاوريها ... كُبِيلها من كل الغناوي دواها وغمضي للعيون و الروح و رددي "بي شمالو يسوى الدنيا بي حالو" و حِبِيها
بوصيك ... علي روحي ... كان تِنصَلحي كان تِنعدلي .... ما تسيبيها للايام تَشَفِّيها ... روحي طفلة بي فرحة ... وضفايرها طويلة منشرحة ... ما مَسْتُورة ... مفضوحة و مُنسَترة ... تنطط في لِعَاب الحي ... تشيلا من المَدَق كم لفحة ... و مسكينة ... ومسكينة لبست الطرحة ... وسرحت تاني للغَفْلة ... وصَدَت ...... و للفَدر تحتاني تاهت و ما أظن ليها من رجعة ...
رويحتي هُولك ... ضميها وخليها التَسْكُن الرجفة ... والوجعة
وبوصيك .. علي رويحتك
المشروقة بي حس البُلود الطيبة ...
بي لالوبة .. وبي الحبوبة ..
بي الراقية و لَفِح توبة ..
بي قنديل ..
وبي منديل
و بي شَجرَ الحَرازو تقيل ...
وبي الساساي ..
وبي الحاداي ..
وبي البكاي
وبي الصد من الوجعة
قبل رجعة ... تعال لَا جاي ..
و بي الخدّر ... وما ودّر ... و اتدردر ... واتودر ... و خلا حداهو نَمَة روح ... وربابة و نغم سطّر ... وقال يا شر .. عليك الحرقة اتْشَرشَر ...و سيب الكر و كل الفَر ... وتعال ياخ قُر ... و فِتّو حماسك المسعور .. وما تكتِر ...
رويحتك غالية ... احرسيها ... وحاوطيها .. وارقيها بي قول الكتاب العز ....
و طاوليها ما تخاليها تغليها ...
بوصيك ... علي الوطن الملان حنية ... وطيبتو توقّد في القلب ... ما تنسيهو ... ياهو الحَمَل عتراتنا ... ياهو الوقف لمن خطاوي الفجعة اتساقط معاها كذب المجمل غيم ... ياهو الوِلِد لمن الحرة حِملت و طلقت زفير الوجعة واتلقانا دون مشروط ...ودون تمتيم ... وياهو الليلنا وياهو الهُولنا ... وياهو سُنطَتنا التَظَل شامخة وياهو بُروقنا الكل ما عَتَّمَت في الغربة ....
خيطو سِراع برد روحنا ...
بوصيلك للأخيرة هناك...
ابقي صمود ...
وسيبي حَلف و صلي على الحبيب ممدود
واعرفي وراك حارساها حدود ...
وابقي عشرة على النية ... ودايما صفي للنية ...
واخبرينا ... بنسند بيك ... وننده ليك ... ونشتاق ليك حد الفوت ...
وكوني بخير ...
ما أصلو الممطورة لو اتبلت ...
مستحيل الشجر المعاها يموت ...
وابقي صمود
ليست هناك تعليقات:
إرسال تعليق