زوله ماليها العناد
زوله الارض ما بتحملها
رحلت سكون فوق السما ...
واحدة و مكشحة بالسواد ...
سافرت ليك كل المدن ...
مهدت ليك كل الحبور .. كل البحور ... كل العباد ...
واخر الكلام .. ريحة الجفا و مني البعاد ..؟؟
مش كنت لي عينيك مقيل ... افتح مع اول صباح و اقفل بعد رحل المغيب ..
مش كنت لي ليلك سهر .. راحل تعيب ...
ما كنت لي بحرك مطر ... وريحة عطر و سحاب و طيب ؟؟
اهتف مع اول رذاذ .. يا مدهشة و يا فرحة و يا ست حنيني و كل رطيب ..
ما مشيت خطوك طريق ...
كنت الطريق من اولو
افرد مساحاتي الوهم لي عينيك سكة و تسيب ...
وتقولي فوق شوقي القبيل .. داير اغيب ...
مين كلف العمر .. الودر ... ساق الحروف تصبح عتاب و كلام مجافي ...
مين علم العينين تكب ريد الفرح وجعة دموع تغسل فرح عمر القبيل يصبح الم لي وجعة مافي ...
لكن وحاتك ... ردت قربك ... ما من غرور قلبي و حضور ... ولا عشان اقفل حنينك باب و سور ...
بس يا ... يا متعبة ... ريدك خلاص اصبح مدى
ورحل الحنين بقى للسراب اشباه ضمير ما مبتدى
وانت يا سمحة زمان ... ما بعتبك زي ما بعيبو الامكنة ...
انا بحفظك ... اجمل حياة و اجمل مدى
وبقى لي انا ... ذكرى و شراع يرحل بعيد و امل جديد بيها ابتدى ...
و عشانا هي ... بفتح كتابي الماهو غافي ...
وعشانا هي ... بقعد بعيد احسب نجوم ريدي الخرافي
و عشانا هي ...
ابقى الصمود ابقى الجمود ابقى المرافي ...
و عشانا هي ...
يبقى الفرح ... شعر و قوافي ...
وعشانا هي ...
ابقى صافي وابقى قادر وابقى وافي ...
ليست هناك تعليقات:
إرسال تعليق