بفتش ليك

كُنتَ بفَتِش ليك في المَاضي ...
وسِرَّ الحاضِر خَافي و مَخْفي ..
أَناجي خَيالَك نُص الليل
و امكن غيرك يصبح مَنفى ...
واسْرح أفكِر ... العيب فيني ..؟
ولا بَرايَا البَطْرى الغَيمَة التَّصْبِح مَرسى ...
وابدا افَكر ...
هل ده حقيقة ....
انو القَاصد الخير بطراهو ..
وبسعى مؤكد شَان ما يحصل
ولا الكذب الزيف المن ..
بلغي الخير الما بِتْخَبى ...
وتاني افكر ...
ليه الفَقر البِمْسَح عُوزةَ الساعي بيقْلب حُرمَة ...
وليه الكَرم الفايت الحد...
بامسي فلَمحَة عين احساس بالعُوزَة وحَوجَة
وامكن تاني تعود لي مَد الإِيد و الشَحْدَة ...
ما أَصلو اللّيهو كَرامَة بحق ...
ما بنوم مَغْبون بسَرقَة يَد بتْمِد .... ويصبح وَحْشَة ...
وكَدي ياخ فَكر ...
لو القَامَة الرِفْعَة الجَاه مَقْرُون بسُلْطَة ....
كان الطِفْل اللسَّه بيَحْبو .. ما بيحْلَم مَرة بي يوم بُكرة ...
وكان الناس الشَاقية وتَاعْبَة في لُقْمَة عيش ... نِسَت العِيشَة وكاسَت فَارغَة في كَاسَا فَارغَة ...وسِكْرَت سَكْرَة ...
وممكن أفكر ...
لمن كَان الطَير الهَاجَر جُوة الجُوف بيطْرَح ريشو عشان القُمْري ...
كُنتَ بحاول أَبقى عَشانَك مَرسَى السُفُن التَبحِر صَادة بَعد الريح التَعْصِف بي مَشاعرك و ليك تِتْهَاود و تَجْلب خُوفَك بَدل الفَرحة ...
وتاني بفكر ...
إيه الخَلّا الزول الإلفة ... زول يتبَدل في لَمْحَة عين و يبقى الجافِى الكَافي وحتى الخير المِنو بيجْفَى ...
وإيه الخَلّا الزُول الرائِع يعود ما رائِع .... ويبقى الارض الخَاوية الجَدباء المَنفى ....
ما أصلو الريد المَا مَشْروط ... مافيهو سلام او قَلْدة بتَخْفَى ...
حاول فَكِر ....
ليه الناس السَمحَة بتَطراك ...
وليه الزول العايز قُربَك ... بِرجع تاني و يتْمَناك ...
وليه كل ما الفَرحَة تَدُق لي بَابَك ... بتلقى البَشر الجَاية عَشَانَك شَان ما تَفْرح حَبَه معاك ....
وكل ما وحشة بتطرى حياتك ... بتلقى أُلُوف زعلانة في قَيفَك ... شَايلة دموعها حُزُن لرؤاك ....
فَكِر حَبه ....
ماكَ الشين ...
ولا بي وشين ...
ولاك الكافر ... نَاكِر دِينك في أَصْحَابك
ولاك العَاق الجَاحد حُب أحْبابك وناس حارسَاك ...
مُشْكِلتَك ... غَافِل ..
شايل حُزْنَك ... و بابك قَافِل ...
وعازل نَفسك من حيرانك ....
وعَامل سَافِل ...
بِنَكْسِروا بَابَك ...
ونَفْتَح قَلبنا لي نَفاجَك ...
و كُل ما تَطرى حَياتك نَسمَة ...
بتِلقى النَاس مليون هَبابة تهِب في نارك ....
ما اصلوا العندو قُبُول من اللَّه ....
بتَلقَى الكُون الحولو بِحِبو ...
و بنحب علشانك ...

نص درامي

نص درامي
الزمان : قبل غروب المطر خلف تلك السحابة الحزينة ...  وقبل طلوع شمس الحنين من بين مقلتيك تتثائب في كسل العذارى
المكان: حيث انعدام الجاذبية ... بين مستراح القلب المفعم بالغموض ... وبين مساحات الغرق في هضاب وجنتيها الورود ...
الشخصيات ...
عاشق مجنون، جميلة مستحيلة، بقايا حساد، ناسك متقشف، بعض الحضور ... ذكور وقليل من الحسناوات ... وملحد ...
مدخل :
في عتمة ذلك الاحمرار في كبد المطر ... تساقطت كل المقاييس المبهمة من سحاب وغيم و سكون ... لم يبقى سوى صرير ذلك القلب المتعب يعمل في هدوء ....
كان ذلك المكان معبق بالضباب ...و على البعد لاحت تلك الورود ...
يتبع ....
مشهد اول:
كيف استطاع اجتياز تلك الثنايا على مقلتيها الحنين ....
فانا عاشق اهيم فرحا بكل ما يلوح على الافق من قراءات ... اتمايل رقصا على راحتيها الحرير ... اسكن مقلتيها وافرد راحتي على تلك المساحة بين الخد والعيون ...هذا الوجد يرقبني ... يزجيني في سجون العشق المعتق بالأنا ... يسرقني فتات خبز في مرآة الطير ...
من انتي يا من تسارقت القلوب المتعبة .... تنافرت الاجابات حولي في ذهول علها ترضي كبريائي المنهزم ... حتى لاحت في البعد الورود ....
كيف اصفها .... سيبدو وصفي ضرب من جنون لكن فالاحاول كاذبا ...
بانة تتخايل من هناك ... تتمايل الازهار معها يمنة و يسرة .... تكشف عن در متناثر ما بين مكشوف في العينين راحة ... وبين مستتر در داخل رتاجين الحرير ... كل ذلك البدر مصون في حالك السواد ... هل ضعف طرفي ام نص درامي
الزمان : قبل غروب المطر خلف تلك السحابة الحزينة ...  وقبل طلوع شمس الحنين من بين مقلتيك تتثائب في كسل العذارى
المكان: حيث انعدام الجاذبية ... بين مستراح القلب المفعم بالغموض ... وبين مساحات الغرق في هضاب وجنتيها الورود ...
الشخصيات ...
عاشق مجنون، جميلة مستحيلة، بقايا حساد، ناسك متقشف، بعض الحضور ... ذكور وقليل من الحسناوات ... وملحد ...
مدخل :
في عتمة ذلك الاحمرار في كبد المطر ... تساقطت كل المقاييس المبهمة من سحاب وغيم و سكون ... لم يبقى سوى صرير ذلك القلب المتعب يعمل في هدوء ....
كان ذلك المكان معبق بالضباب ...و على البعد لاحت تلك الورود ...
يتبع ....
مشهد اول:
كيف استطاع اجتياز تلك الثنايا على مقلتيها الحنين ....
فانا عاشق اهيم فرحا بكل ما يلوح على الافق من قراءات ... اتمايل رقصا على راحتيها الحرير ... اسكن مقلتيها وافرد راحتي على تلك المساحة بين الخد والعيون ...هذا الوجد يرقبني ... يزجيني في سجون العشق المعتق بالأنا ... يسرقني فتات خبز في مرآة الطير ...
من انتي يا من تسارقت القلوب المتعبة .... تنافرت الاجابات حولي في ذهول علها ترضي كبريائي المنهزم ... حتى لاحت في البعد الورود ....
كيف اصفها .... سيبدو وصفي ضرب من جنون لكن فالاحاول كاذبا ...
بانة تتخايل من هناك ... تتمايل الازهار معها يمنة و يسرة .... تكشف عن در متناثر ما بين مكشوف في العينين راحة ... وبين مستتر در داخل رتاجين الحرير ... كل ذلك البدر مصون في حالك السواد ... هل ضعف طرفي ام انه يخال كالظل يتبعها في خجل ... من كل احلام البراءة الممزوجة بالحياء .... يا رباه ربما ارتد لي عقلي المذهب برهة .. او ربما هذا هذيان الجنون .... يستحال ذلك النور الخفيف المسلوب على مهل ما بين راحة حرير و اهداب سكون تزيح ذلك المغرور القمر ... انه يخال كالظل يتبعها في خجل ... من كل احلام البراءة الممزوجة بالحياء .... يا رباه ربما ارتد لي عقلي المذهب برهة .. او ربما هذا هذيان الجنون .... يستحال ذلك النور الخفيف المسلوب على مهل ما بين راحة حرير و اهداب سكون تزيح ذلك المغرور القمر ...

حاورني في نص السطر

مالك نسيت ياغالي سر
خليت قليبي جمر جمر
حيران افتش في الدفاتر
عشان خاطر حرفك يسر
قولي لي في غش امتحان
قفل دفاترك وابدى قر
ارمي الورق واسرح بعيد
وحاورني في نص السطر
تسألني من اول سطر
كيف انت
وكتين اراضيك تستقر
اسرح معاكي في دنيا غير
دنيا ما بتشبه بشر
ابحر و اغوص في ريدي ليك
رحلة قلب جوه الصدر
تبقى الشراين سكتي
وحمرة الدم هي الممر
والاوردة اه منها
ترجع تعيد ساقياني در
ونبضك البضرب موسيقى
و ردك المطر ينهمر
وايقاع تناغم رجفتك
و هبوط حنينك لي يسر
وضغطك المرفوع فرح
يفرح قليبي الماهو حر
واوعا من السكتة ديك
تقتل مشاعري ولي تكر
ويرجع النغم الحنين
ونظام هواك يرجع يمر
واقلب الدفتر واقول
امكن اكون فاقد سطر
وارجع واعيد من تاني كيف
اقدر احاور او اشاور او افر
وريني ياخ ردك براك
حاوريني ياخ في نص سطر

بت السما الفوقاني

ما من هنا
الليلة غير ...
جانا الفرح
زي كل يوم
يسعد يجينا
لكن ملامحو الليلة غير
جانا الفرح ...
لابس بنية
بت في الارض ...
لكن اكيد ما من هنا
نفس الملامح مسعدة
ونفس المشاعر هية هية
بس ...
ما من هنا ...
من بعيد ...
ما بتشبه الانس في الخلوق
ملكة خلوق حارساها جاني
الشبه ... ما من هنا
مراية روح تعكس شجون الحاني
ما من هنا
شفافة قلب تفرح تداوي ...
ما من هنا
من عند القصيد نمة واغاني
ما من هنا
من جمب السما الفوقاني ...

إني خلقت لأعتذر

أنْ أعْتَذِرْ
إنِّي خُلِقْتُ لأَعْتَذِرْ
مَنْ ذا أنا ...
حتى أجُورُ و أنتَصِر
من ذا أنا ...
حتى أخُوضُ فَسَاداً ..
في قُلوبِ بَعضِ البشر
حتى أنا يبدو مصيري أنْ أموتُ وأنْتَحِر
لكن أنا ...
هذا أنا ...
رجلٌ كفى
أحمقْ كفى
أبدو هُنا ...
أرجو هَناء ...
علَّ الحقيقة تبدو جميلاً يَستَمِر ....
هل جُرأَتي تغدو شجاعة
هل أنا أبدو اصطِناعة
هل ذا جُبْن ...
هل ذا قليلٌ من ذُل ...
هل كلُ حُر ... ؟
لا أكتفي من هذا سر ...
فليقولوا ذُل ...
او يقولوا جُبن ...
او حتى بقايا رجلٍ ... يحتَضِر
لكن أنا ..
أشْجَعُ مِن قَولِ الحقيقة ..
أنِّي
رَجل
والرجل قد يعتذر
أنا أعتَذِر

مدخل عاص

مدخل عاصٍ
تعودت السلب ....
عشت حياة ملأها حب الجور على حق الغير ... كانت دائما ما هناك حجة وتبرير لتلك الافعال الشنيعة ... من منا لم يعجب بحياة الصعاليك ... ان تكون قاطع طريق ... ذو صيت بديع و مشهور باخلاقك الدنيئة ... وحب ممارسة الرذيلة .... الانغماس في المعصية حتى نميل الى جانب تصديق انها ليست معصية و انما هي نمط حياة ... فيصبح شربنا السُكر .... وتعاطينا الالفاظ البذيئة ...... وجُل سعادتنا اضافة الاذى على الطريق ...... وتعالينا في وجه اخينا صدقة .... فنكون قد وصلنا اعلى درجات الانحطاط و الحضيض....

لكن .... تأتي تلك اللحظة ... ونحن في غمرة المعصية .... ويدنا تذهب الى الحرام لسرقة مال يتيم ... او في منتصف شبهة ... تلك اللحظة ... التي لا يتجاوز مداها الكسر من الثانية .... تلك الثانية التي يمر فيها شريط طويل يبلغ مداه اقصى حياتنا ... وتتوالى الاحداث التى تقود الى حقيقة واحدة ... انه رغم معاصينا و رغم اثامنا .... أن الله معنا

بريدها

وكُتْ واقِف
وأنا المَشْتُول جديد في فَصلَ العِشِقْ والريد ...
وقِدامي الفَرَح مُمتد
بَلَعتَ الريق ... واتنَهدتَ ...
وقَفَلتَ العين ...
وغازلت حبة العرق البتقطع مسافة الشوق على جَبين الراح و البَين ...
أنا أصْلاً ما شَبه كوم الحَنين مَطرُوح فوق قَامةَ الطَيبين ...
أَعاين في دَواخلَ القُول ...
وأقيسْ بين المَسافة الحُب ...
واداري أنين ...
وألمح في الخَلِق جِنيات ...
واحد بِبرا في الدَارات ...
و ببقى ثَبات ...
و يغَازِل دُون خَجَل حلا بْنيّات ...
وواحد زِيف ..
بقُول تَكليف ..
و بطرى الريف و حُضنَ القيف ..
ويقول نَمَّات ...
وزول جُلمود ..
بقول في حُدود ..
وكلامو كلو عن الحُزُن والموت ... 
وزول حَارّات ...

وكانت هي..
واحدة قريبة ...
ما بتشبه الإنس الخُلوق غِريدة ...
ما بتشبه السُحُب التَهاتي لي رَعشَة أمل
وتطرى غِميمة
ما ليها في الشجر البِضُل ضِليلة لي ورد الربيع يحميها من شمس الضحى الحِرّيقة ...
ما فيها من طِفل الحفيد في الحُب ...
ولا من قول السعيد يا ربْ ...
كانت هي ...
ما ليها في كل الخُلوق اتنين ...
ولا حتى البقول يخلق من الشَبه أربعين ...
ولا المحتار دي بت من جن ..
ولّا من الإنِس والجِن مَخلوطين ...
كانت هي ... اسباب العِشِق و البَوح ...
وكانت هي ..اسباب الرحيل و الرَوح ..
وكانت هي .. اسباب المسافة جُروح ...
و سِت من رُوح ..
كلامها بِرُد على الغايب مسافة النَوح ...
و بيجري في دم الفَقد جنياتو هَدّ صُروح ...
و بمشي عليك في قَدلة و جَرّة صَوح ...
ويهَترش زي درويش الدَارة في الحُولية ...
بطرى الجَيّة و شَبَه الكَيّة و قُولتْ أحيّة ...
و راجي السَكْره منو تَروح ...
وفَتَحْتَ العين ...
و عاينت في وجوه الخَلق الغافلة من قولي البِدور تَنهيدة ...
واستغفرت من فِكر الحَرام الخلى في قلبي الكلام يغيب تَشْريدة ...
وجاهدت اللسان النطق بكلام في الريد وقال ما تريد و غلبو القول وقال تَعْويدة
واتزكرت قولةَ البِت البِتبرا حَبيبها ....
"تقولا وسط كلام الناس دون ما تحس و تبدى تغازل في الكلمات و تقول وتنز .. و تزيد عليها في البحر البهز وبلز ... و سل قيدها ......"
لو بتحب ...
أنا الراجياك ... و مهري ممكن يكون قَصيدة ....
وعاينت ... ولقيتها هناك مُهرة صَيدة ...
وشمّرت السواعد راجعة لي ضُل قَيدها
وفتحت الريد ...
ونطقت بالمهر البجيب الريد
وقلت
بَريدها ...

الأحلام

بعضُ الاحلامِ نتمنى انْ تستمرْ دونما تنقطع، دونَ فواصلٍ او نهاية ، حتى نصلُ منها حدَّ تشكيلها واقعاً، فنتخيلها حقيقة و نتعاملُ معها بذلك الانتماءْ الذي يدفعنا نحو الانغماسِ في تلكَ الشخصيةُ الحلميةُ، فنتعاملُ مع مفرداتِه بقربٍ، و ننجرفُ نحوَ احداثِه بتأثرٍ، حتى يكادُ الحلمُ يتملكنا، فننتقل من مرحلةِ تَشَكُلِهِ و نحنُ نَغُطُ في نومٍ عميقٍ الى تلكَ المُسَماة احلامُ اليقظةٍ، وفيها يبدأ تعلُقَنا بذلك الحلم يزيد، ويبدأ اثرُهُ السلبي على حياتنا عندما ينتقل من إناءِ اللاوعي الى عالمِ الوعي و الحقيقة، فنجد انفسنا نحدثُ من فيهِ من شخصياتٍ اذا كانت حقيقية او نُشبهها بأخرى اذا كانت خيال، فنبدأُ بالتقربِ منهم و محاولة التعرفِ عليهم، ونبدأُ بخلقِ حوارات تُشابه تلك التى كانت في اللاوعي، فاذا استجابوا كما الحُلم تعلقنا بهم اكثر، واذا لم يستجيبوا، نبلغُ درجةً من الاحباطِ و الانكسارِ ما يجعلنا نتمنى ان نُغلقَ اعيننا علنا نصحو من ذاك الحلم.

فهكذا هي الاحلام .... تستجيب لواقعنا تارة ... و تقذف بنا في دنيا من الخيال تارة اخرى ... تنقسم ما بين مرغوب و ممنوع فإما حلم جميل او كابوس اليم .... فالحلم الجميل يندرج تحت ما نتمناه فإن تحقق فقد بلغنا الغاية و ان لم يتحقق فعلى الاقل جلب لنا بعض السعادة المؤقتة ... وأما الكابوس الاليم فهو في قائمة الممنوعات ... قد يؤدي بنا لفقد الحياة اذا ما كان واقعا ... واقله اضرار جانبية ... ارق و سهر و رهبة وتفكير عميق في ماذا لو كان حقيقة

ورقة في شجرة العيد

خضراء ... مائلة الى الاحتقار
سقطت من شجرة العيد في ينبوع ماء ازرق
يصب في بحيرة سماوية
حولها سبعة انهر
تبكي في محيط من اليأس
ينوح الما و حسرة
على كل وردة ... جميلة .. ندية ... بيضاء ... وتذبل
تغير من جمالها على نفسها
تكاد ان تكون النار
تلقيها بقايا من بشر
تمرح في دنيا من الشرور
سوداء الطليعة .... داكنة الجوانب
تصرخ على فارس احلامها
ليحملها على جواد رمادي اللون
يجوب بها كهوف الغدر وجحور الحسد
لينتقم من كل انسان
يرسم عليها بكل لون .... بلهفة فنان
يغير عليها بأجمل اللوحات
التي تعبر النسمات كطيف خيال
أشجار وأحجار
ورود وأزهار
بحار وأنهار
حيوانات و بشر
دفتر رسام
كل ورقة تحمل رسما
يعبر عن حرف الحقيقة
جملة تصاغ بالوان مختلفة
نارها جنة من خريف
امطر مطر خفيف
نسمات ربيع على وجه القمر
لفحات برد الشتاء على نور الشمس
حب الصيف للدنيا
عشق روميو لجوليت
وقوفه اسفل قصرها
يحمل عوده السحري
يرسل منه اعذب مقطوعة
سمفونية القمر
تتراقص الالحان السحرية
كعصفور في فرحة عشقية
تنطلق كالسهم لتقتل قلب جوليت
فتهوي من اعلى القصر
نحو احضان الحب
فتستيقظ الورقة
لتجد انها
ما زالت في شجرة العيد

ورقة في شجرة العيد ٢
يا أيتها الورقة
هل حارك تقلب الاحوال حتى كان السواد أجمل لون
ام ان السنين التي مضت
لم تجر على اصحاب القلوب الصالحة
أم ان اسطورة الحب الابدي
تاهت بين ذل روميو و خضوع جوليت
فكانت كلها اوهام
والحقيقة منها اضغاث احلام
لكم وددت ان تبحري في سفينة نوح
لتفكي طلاسم هذه اللوحة
لكن مدي يدك الي لنزيح الستار عن هذه اللمحة
أما الشجرة فهي دنياي التي تبدأ من العدم
تقتات عيش همومها من قليل
تارة قطرات ند صافية
وتارة وحل وطين
تارة تداعب نسمة أغصانها
ويا ويلتي من ريح عصيف
لكنها تأبى الا الصمود
كلما عصفت بها ريح سموم
قبضت على بعضها في سكون وحدود
فهذه شجرة تبدأ من خمول و تنتهي في خمول
وأما الوردة فهي العنفوان الابدي لما يعرف في التاريخ بلغة القلوب
لمحة غزل تنار في هذه الدنيا لتسكن روعها
ولكنه وكما تحكي الاساطير آفة اجمل من كل جميل
لا يمنح الناس الأمان ولا يقطع البحر الامين
فهي قمر الدنيا الذي يطل على الوجوه ليلة
لا يلبث الا و ينهزم للشموس
وأما الفارس الاحلام فهو آفة العصر الحسود
وأما الفنان فهو مدمر القديم و ماحي الجروح
فهي حرب بين فارس و فنان
وعسى ان يكون الفوز للريشة والالوان
وأما روميو و جوليت
فهي لعنة تحكى بصوت الامهات وتتغنى بروح الاطفال
قلب قلب قلب ..... كان الوجود أحب
روميو فتى جميل .... بلحنه أطرب
قلب الجميلة جوليت .... كانت عيون الاب
كانت تراث الكل .... كانت طريق درب
لكن بحور الغدر .... لم ترضى الا السلب
لم ترضى الا الموت .... لمن احب الحب
قلب قلب قلب
عسى ان اكون شفيت بعض غليلك
وأضأت بعض الشموع التي كادت ان تذبل
والا أغلقي عينيك و تمني ان تحظي برسالة من محب
فيها
الكل يسأل من انا
والكل يعجز عن اجابة ....

قوس قزح

ياخ اقولك حاجة
تعالي نتفاكر....
وادي خيالك بس فرصة
والنفرض مثلا انو الدنيا لون اسود
اكيد الظلم لون اسود
واكيد الكره لون اسود
واكيد دبرستك المجهولة
وضيقة نفسك المهمولة .... لون اسود
لكن سؤال ...
هل تعبيرنا بي انو ...
جهلنا المبني على انو.....
كل عتماية و كل نكداية و كل غيباية شايلة حداها لون اسود
منو الصنف بان الزول ... وكت ما يكون زول بكون اسود
وانو الحال بتبدل حال .... بكون اسود
ممكن يكون دا اسود غير ...
لانو اظن ... والله اعلم
نفس ضلام الليل البخوف ضال ....
بسكن خوفنا  لون اسود
ودا ما مني دا من الله
سباتك ليل اكيد اسود
وانو سمانا بتكون اجمل
وتعكس كل حنان نجمة
بتبقى جميلة في الاسود
وصباحنا حال القهوة في الفنجان ...لون اسود
ياخ حتى حدادنا البنوهب ليه هذا اللون
بعكس جماله في سهرتك فستانو اسود
لكن سؤال ...
ممكن سؤال ؟
هل انت بس ....
مصبوغة بس ...
مرنوعة بس ....
مطبوعة بس بلون اسود
باقيك وين ....؟
ممكن جواب؟؟
انا ...
شفت الحمار في وجنتك
في لون خديدك وخدتك
في شفتك ...
قالت نغم
ليهم اسر
احمر ظهر
زهرك حمر ...
دمك حمر ...
ياخ حتى شاهينا التقيل نص العصر بصبح حمر...
لون الجمر ...
لون التمر ...
لون الخطر
لون .... احتضر
باقيك وين ....؟
وريني يا سر الكدر

كان فيك صفار
قمحيهو سار
لون الورد وكتين مزار
لون الدهب هبانو حار
وين ياخ دا طار
باقيك وين ...؟
يا ...  رمز الحيار

طب وين سماك و حنتك
طب وين بحورك و نيلك و فرحتك
خليناهو الفرح .... وين المجاري لدمعتك
وين ياخي طيبة زرقتك
باقيك وين...؟

وين الخدار ...
لون الودار ...
عشبك مزار ...
ند وبهار ...
خضرة في سهلك وواديك
و ياااااااا نهار
اعكس علي طيبة الخدار
باقيك وين ..... ؟
باقيك طار ...؟

وين الغروب
لون الشعوب
كل الشعوب
ولون غسق فجر و هبوب
والبرتكان يعصر حبوب
يبرد حشاك الكان حروب
يفرح قلوب
باقيك وين  ....؟
يرجع يتوب

وين بهجتك
لون عندتك
حب وهلتك
وردك بنفسج طلتك
باقيك وين ...؟
ياااااا سمحتك

وين ابيضك ....

ممكن اقول .... ؟
ابدا الغسول ... ..
شان ما يتنفض لون الذبول ... ؟

مما عرفتك قلت ابيض
زول حنين
زول رزين
بعكس دواخلو في لونو ابيض
ويبدد الحزن المضى
و يكسي الجوانب لونو ابيض
لون النقاء
لون الصفاء
لون الفضاء
لون الدعاء ....  مو ياهو ابيض ... ؟
وريني بس هل فيهو شينة ..؟

لون الشتاء .. ؟
احلفي وقولي بتحبي الشتاء ...
بي بردتو وبي دفيتو
و توب جمالو اللونو ابيض .
لون العدم .... من قال عدم
اتعدى اتجاوز ندم
وزال كل حرابة و جور و هم
هو اكيد عدم ... عدم كل النواحي الضالة في انفاس و دم و خلف نغم
باقيك وين ..... ؟

جاياني بي نص الالم
ربع الجسم
خمس الفهم
تمن السجم
و تقولي تم (كسر التاء)

جيبي الخدار ....
وعليو صفار
ولون الحمار
وازرق معاهو لون الدمار
شوفي ايه اخر دا
سم.....؟
قولي سم ...
بمحيه ايه غير البياض
.
.
باقيك وين ...؟

باقيك تم (فتح التاء)

فاقد سطر

تسألني من اول سطر
كيف انت
وكتين اراضيك تستقر
اسرح معاكي في دنيا غير
دنيا ما بتشبه بشر
ابحر و اغوص في ريدي ليك
رحلة قلب جوه الصدر
تبقى الشراين سكتي
وحمرة الدم هي الممر
والاوردة اه منها
ترجع تعيد ساقياني در
ونبضك البضرب موسيقى
و ردك المطر ينهمر
وايقاع تناغم رجفتك
و هبوط حنينك لي يسر
وضغطك المرفوع فرح
يفرح قليبي الماهو حر
واوعا من السكتة ديك
تقتل مشاعري ولي تكر
ويرجع النغم الحنين
ونظام هواك يرجع يمر
واقلب الدفتر واقول
امكن اكون فاقد سطر

ابونا الناس

ابوك ناسك
وابوني الناس
حموك كاسك
وملوني بفاس
وقالوا سعادة لي غيرك
سعادة كتيرة ما بتنقاس
وسعادة عليك اكيد حرمة
وسعادة علي وجعة راس
نفرح ليه ...  ونحن الخانا ما زولنا
خانا ضمير اعز الناس
لقيتك في درب رايح
درب لي ودرب حساس
سألتك قلت ما عارف
كأنو الناس دي ما هي الناس
وكأنو حياتنا ما ياها
وكأنو العرق صبح دساس
ناس حلمانا بي روحا
وكنوز روحا دهب والماس
ما هماها غير روحه
وروح الغير رخيصة خلاس
ولمن قسموا الفرحة
كتبو علينا بس ننداس
.....
يوزعو في الغرام والريد
ويقولوا حقوقنا ماهية
واي زول بشيل حقو
و فوق الحق زيادة شوية
ولمن وصلك الطابور
عليك اخر العقاب مشرور
من الكره ملوك ملية
و فوقو الدمعة محنية
واخر الريد صبح هتاف
ملوك فوق ملوتك تية
وفضل من عذاب الوان
وعليه جروح تقول مية
كالوهم و زادو الهم
وعليه الحظ كمان شوية
وضنك الحال والم العيش
وفقر  وهموم و تلوية
وقالوا كمان وحات الشر
نشر فوقك عقاب سية
ولو رضيان نزيدك حر
نمد نيرانا جمرية
وتبقى براك عقاب الضر
و روحك بي هجر مكوية
و بعد الكان بعادك فيه
غرام روحك وجع  لييه
اقالدك شوك صبح مشرور
و اضمك آهة مروية
وفوق همك ازيد همي
ونبقى جروح....
و منسية

رسالة الغُربة للمَبْشُوشَة

حَركَاشةَ الحنين الكَيّ
تَقاية البَرد و الصَيّ
يا مَفْدوعَة ... يا مَصْدوعَة ...
يا بِتَ الحَراز واللّي ...
رِسالة بَحَمِلِك ليها ... تَغُور في شنطتك تُوهَة
تَتَقِل في عَقاب سنين الغُربَة و الرُوقَة ..
أقِفْلي الباب ...
و افتحي لي غَرام الروح ضَرا و نَفاج ...
واسمعي للكلام المطرة و النُقَارة والفَرارة و مَدَك الطين ...
بوصيك ... ويا حليل وصية المفارق على بلد الصقيع و الزِيف ..
بوصيك ... وخلي كلامي ليك تَنور ... تلولي في نارو ما تطفي اللهيب الشوق ..
بوصيك ... وودعتك في حصن الله المنيع التُر و خاطر حرفك المدروش ...

بوصيك ... علي الدرب المسكتي عديل ... لا تِنحرفي ... لا تِنجرفي ... لا تِنجلدي .. لا تنسي العهود البَارقة ... لا تِنهدي ... يا مِسكِيتة ياخ هَدّي ...

بوصيك ... علي كل الحكاوي حنين ... علي البفرق مع الترحال ... وبتبدل مع السَرحة و ريحة الغربة شايلة الطَمْيّة و الدُعّاشة كُمشَة فال ...

بوصيك .... علي القهوة ... لاطفيها ... وغازليها و بي راحة روحك السمحة قَلِيها ... وحبة بُنّة في سَهوة ... تَقَلِّيها بي عبق ريحتك ... اعملي حسابة من حُرقَة ... ومايليها في هداوة روحك ... ومايلي معاها كل سَهوة ... و دقيها ... وخليها التدق جرس الحنين في فندق و صارحيها ... حاوريها ... كُبِيلها من كل الغناوي دواها وغمضي للعيون و الروح و رددي "بي شمالو يسوى الدنيا بي حالو" و حِبِيها

بوصيك ... علي روحي ... كان تِنصَلحي كان تِنعدلي .... ما تسيبيها للايام تَشَفِّيها ... روحي طفلة بي فرحة ... وضفايرها طويلة منشرحة ... ما مَسْتُورة ... مفضوحة و مُنسَترة ... تنطط في لِعَاب الحي ... تشيلا من المَدَق كم لفحة ... و مسكينة ... ومسكينة لبست الطرحة ... وسرحت تاني للغَفْلة ... وصَدَت ...... و للفَدر تحتاني تاهت و ما أظن ليها من رجعة ...
رويحتي هُولك ... ضميها وخليها التَسْكُن الرجفة ... والوجعة

وبوصيك .. علي رويحتك
المشروقة بي حس البُلود الطيبة ...
بي لالوبة .. وبي الحبوبة ..
بي الراقية و لَفِح توبة ..
بي قنديل ..
وبي منديل
و بي شَجرَ الحَرازو تقيل ...
وبي الساساي ..
وبي الحاداي ..
وبي البكاي
وبي الصد من الوجعة
قبل رجعة ... تعال لَا جاي ..
و بي الخدّر ... وما ودّر ... و اتدردر ... واتودر ... و خلا حداهو نَمَة روح ... وربابة و نغم سطّر ... وقال يا شر .. عليك الحرقة اتْشَرشَر ...و سيب الكر و كل الفَر ... وتعال ياخ قُر ... و فِتّو حماسك المسعور .. وما تكتِر ...
رويحتك غالية ... احرسيها ... وحاوطيها .. وارقيها بي قول الكتاب العز ....
و طاوليها ما تخاليها تغليها ...

بوصيك ... علي الوطن الملان حنية ... وطيبتو توقّد في القلب ... ما تنسيهو ... ياهو الحَمَل عتراتنا ... ياهو الوقف لمن خطاوي الفجعة اتساقط معاها كذب المجمل غيم ... ياهو الوِلِد لمن الحرة حِملت و طلقت زفير الوجعة واتلقانا دون مشروط ...ودون تمتيم ... وياهو الليلنا وياهو الهُولنا ... وياهو سُنطَتنا التَظَل شامخة وياهو بُروقنا الكل ما عَتَّمَت في الغربة ....
خيطو سِراع برد روحنا ...

بوصيلك للأخيرة هناك...
ابقي صمود ...
وسيبي حَلف و صلي على الحبيب ممدود
واعرفي وراك حارساها حدود ...
وابقي عشرة على النية ... ودايما صفي للنية ...
واخبرينا ... بنسند بيك ... وننده ليك ... ونشتاق ليك حد الفوت ...
وكوني بخير ...
ما أصلو الممطورة لو اتبلت ...
مستحيل الشجر المعاها يموت ...
وابقي صمود