دراسات جلادية

رَكَّازة العِقد ممهولة ...
مرثية العَقد الفريد ...
طريتك ...
وَكِت كان الزمن ضَحَويّة ...
والطير المهاجر غطى فوق جِنْياتو بي حنية ..
وداع مقرون بدموع السلام والمُنية ...
تنده في الخلوق الفاتت
تَصُد الضرا الممكون
وتغازل سَرحة في امونة ...
وتَضرب النُقارة تبدا ...
"ماضهبت اقول لقيتك"
وكيف القاك عشان ما افوتك ...
افوتك كيف والقول البِحد الرايحة
"انت في خوفك تكاتل رفة الطير والحفيف"
وافوتك مع القِلة .. و"الباب البسل العيش الله بسلها"
واصد مع الكون الثوابت ...
ما بكابد وما بجابد و" والزمان ثابت مكانو .. والرقم اللسه واحد"
واسيب الوجعه ... وابدا افرح ...
و"نحن اهل الفرحة جينا لا المدامع وقفتنا ولا الحكايات الحزينة"
والمكان بشبه جنينة ... مفروشة بي خدرة ومطيرة "مع انو من خير الخريف لافحالها شال" زاين وشيها
ولمن زغرد القمري البلوم ... طلعت هي ..
ما بتشبه الخلق التنوم ... ما بتصحى بي نباه صباح "قيرة قيرة يا مهيرة .. يا شتلاية جاتا مطيرة" فرحة خير
ولو جافيتي من هولي "بقول باختصار لانك كأنك هموم الحصار .. اهو بعدت عنك فإيه يعني صار"
لكن وحاة ريدة الحبيب و وحاة ريد القريب ... استغفر وانا البحلف بغير الحي ...
وده" النفاجو فاتح ما بين جيل وجيل نفحة محمدية دفئا كالضريح ...ميضنة كم تلالي .. جيدا في الليالي مجدا في الاعالي ... مريم والمسيح"
ويا مرمية في جوف التعاب والبين
ويا مسقية بي موية المطر والنيل ...
تفارقيني والقرقريبة قريبة اقرب من قريبة الموية والناس التَقيل
و"غطاك شذى الياسمين و الورد والريحان و عشاق سمر بالليل سحرهم جمال النيل"
و نسرح برانا ما همانا قول عزالنا وتاني نميل ... و خانوك ... وشانوك .. وانا الكلام الشين ببكيني ... وحلفت الا اغطيك من عويناتم ...
"ومسكنا دربنا وعمال الطمي الصحونا خابرين الدروب مرقوبنا فوق مشرع مسارب الضي وودونا على البعرفو الصي ... حصى القيزان ودابي الدارقة والسحلية والناس التحت خابرين عمايل.." البرمو في عرض الخلوق طاعنين
وشان احميك من قولهم "وياك من كان سبع جمرات .. دابي الخشة قال ادوها في الجمرات تلات جمرات"
و سكنتك وعشنا حريق "واعرف انك الزمن اللي جاي شروق ..واعرف انك الزمن الحبيب و حنون"
وسايرتك وجالستك و شلنا همومنا ..
"وعارف الوجع في الجوف تقيل" ...
لكن ياهو المصير ... وليه نهرب من مصيرنا ...
ولو صحيح .. ينعيش دوام بي حب فرحنا ...
ولو صحيح .. بندوم عشق في عز وجعنا ..
ولو صحيح .."غنينا بالدمعة الحزينة" انشودة سعدنا .. "شان هنانا ... وشان منانا " وشان نقفل اللوم الحزن في دفتر الزمن الكئيب ونحرق غلافو من الالف ونكتب " حمام .. وسلام و سعادة بجد"
ونتم خطانا ..