بتعبد ربك ... نوم ... وتصحى مع النباه البغازل حنك
بتفتح عينك على القمر المحكر جنبك
وتتبسم
وتحمد للكريم انو القمر نور صباح جمب الغيوم وتتأمل السمحة ام عجن ...
ملاك في رحمة النوم العميق ... تشرح الصدر البشيل الهم ... تشيل الهم و تتفنن
اااااخ منها المسقية من عسل النحل ممزوجة بي طيبة اللبن
وااااخ من كوم الحلا ... لمن تقوم و تتمغى شان تروى القلوب موية السعادة تفرهد الورد الحضن ...
وفي ثواني
تلقى الدنيا ملفوحة في عباية ...
وتلقى الريدة المحكرة في القلوب صبحت حلم وانين و غاية ...
تبدا تتأمل في خلق الله وتبدا تتعبد كأنك في صلاة
تتوضا من موية الجمال ...
وتقيف في محراب الزمن شان الصلاة ..
والله اكبر
تلقى الزمن وقف سنين
وعقرب الساعة الكبير اتشل في دهشة الخلعة الصغير ..
وكل العلامات البتخلق في المكان ماتت عدم ... واتشهدت لمن ظهر .. اية الخالق السبحانة جل وما خلق
ومن طين اسباب الحداد ...
ديسا طويل حاضن البدر جوة السواد
زي انو بيعاين خجل من جوة بيت تاكيهو باب
يظهر و يغيب ... يمشي ويجي ... لمن يغازل لمحة مع نسمة الليل الرماد ...
بسم الله ابتديت جوة القمر جوزين بدر فيهم سواد
يا ربي ديل جوزين عيون ولا القمر مليان سراب ...
وامكن كمان مليان تلال وشوية سرحات من رمال ...
يارب تكون ديك الخدود ولا القمر فيه حبات من هضاب ...
واييييك بين العيون والخد مساحة تهت فيها ... رهاب رهاب
والله اكبر ...
بتبتسم ... والله جد ... بتبتسم
وامشي وين لمن وردتين حاضنين درر يفرهدن و يتشتت الدر المصون .. امكن اجن ...
ويا رب متاب ...
القاها وين من العيون او من خدود او من شفايف زي عناب ...
وفجأة تكسر صلاة السر ...
وتبدا تدعي في دلع و غنج وود اسباب من عذاب
تعاين صاح ... وتسبل سكوت و زي جنحين فراش يتلاقوا رمشين من دهب قلدة نصاح ... و براحة تئن
وتهمس حن
صباح الخير ...
واااخ يا الخير لو تعرف كم بحبك ...
وارد في سرحة الزول اللي راح مع الايام ...
صباح النور علي الطيب الملانا بخور ..
صباح القمر البيتقطر فرح و سرور ...
وحاة الله بفرح كيف لمن اسمع النغم الملان غنا و طمبور ... وبفرح اكتر لمن اسمع الكلمة التهد السور
اخ انا من النظرة البتكسر قلب الفارس البشل السيف
وبخوضا بحور ...
واخ مني لمن ماسة مقفولة في قزازة تغازل الزول الحديد ببدا اثور
كدي عايني لي ...
عشان بحلم و مرات لمن احلم ببدا اصدق الحلمة وبغوص في غي
وعشان اتأكد انو القسم لمن اتوزعت ياها دي ال الله كتبا لي
عايز اسأل سؤال في مكانو .. و يمكن يكون سؤال في مكاني ....
بتحبيني ...
وردت حب ..
وبي قلدة و ضمة وغوصة و بوسة و حضنة ولمة
ردت
بحبك ...
وااخ احي ...
واااه يا رب
ووردت تاني ... وبي نفس القلدة الضمة الغوصة البوسة الحضنة ونفس اللمة ..
ممكن اسأل نفس سؤالك
مش من حقي زي ما زنت الشوق في كلامك ممكن اسأل شوق علشانك
وانت كمان بتحبني
بحبك
بحبك
و حبي حقيقة
و ما هو خيال و شعر و قوافي
وتاني بحبك
وكيف ما احبك ...
وانت العنصر ...
اخر عنصر في تكوين الريد السامي
وكيف ما احبك
وانت المزجت كل دواخلك ريح انسان في لهفة بهاتي
وليه ما احبك و انت الحبك جنن كل الكون و سقاه في غمزة عين احساس متصافي
وتاني بحبك ...
واسرح وامرح وارجى الطفل الساكن قلبي يشابي عليك و يحضن قلبك شان الريد البنبع منو ريدو الفطري الما هو مزيف بكلمات ... و شعر و قوافي ...
حب الطفل ... الراجي سحابة تمطر ريدة و مطر الريدة حنين و صافي
حب الطفل ... البفرح فجأة لمن يرجع ببكي لحضن الام الهادي الدافي
حب الطفل ... الاول كلمة لمن يهتف بي يا يما او يا يابا يفرح كل البيت الشافي
وتقولي احبِك ...
ليه ما احبِك ...
وانت الخلقك ربي في ضلعي الاعوج وما متقوم و عليه بقوم حبي الحافي
وليه ما احبك ...
وانت الام الحواء ... الاصل الخوة ... النار الجوة ... توقد قلب الغافل وغافي
وليه ما احبك ....
وانت الاروع من احساس الغايب فترة وراجع تاني يتاتي و يهاتي
وليه ما احبك ...
وانت النص التاني لديني و بيهو بكمل ديني المافي
وياخي بحبك
بحبك
وبحب الحب البنبع منك
وبحب الزول البنطق اسمك و رسمك و بسمك
كل الاسود من لون شعرك وكحلك وحنك
كل الابيض من طيب قلبك و براق سنك
وحتى النيل الفارد فاه برشفة فمك
وكل الزهر الشارد منك من طيب ريحك عبقك عطرك
كل حصحاصة اضلت منك و من ذوق ضلك
وكل هدماية بتستر جسمك
كل عبقاية طيب منجم بتلمس لمحة من لين جلدك
كل الرمل البنثر تحتك
كل الناس الختت ايدا فلمحة يدك
ومرت جمبك
وجات بي جمبك
وقعدت جمبك
ومدت ايدا في حوض ايدي
وكانت جمبك
ياخي بحبك
وتاني بحبك
واقول باعلى الصوت البعبر كل حدود العشق الصافي
بحب احساس الحب البنبع من حبي الحادي و حابي
وتاني بحبك
وحبي حقيقة
وماهو خيال
و شعر
وقوافي
ليست هناك تعليقات:
إرسال تعليق