لمة خير

في البداية
وقبل ما احكي الحكاية 
عندي عتبة وناس معايا وما معايا 
كيف يكون كل الكلام ضحكة عيون 
كيف تكون كل الوجوه هالات حنينة
ونحن لسه بنتوه في الجنون
وناس تتوه في زول حنون
وتحكي ليه
وتشكي ليه
وترحل الاشواق عليه
ونحن نحن
يانا نحن
ما بنغير ولا بنسير
ولا الحفير جاب الحفير
نحن بس حبة رمال
وموية زير
وليمونة
وضل تاكاية
وخير وفير
وحبوبة
وهبابة
وساساكا
ومفراكة
وتقلية
وقراصة
وريحة هنية
ويد رضية
بتسقي لينا
وتشقى لينا
وتمسح الدمعات من عنينا
ولسه نحن يانا نحن
ما اتبدلنا
ناس حلوين
ومتقادلين
ومتحابين
ومتفاهمين
زعلنا هظار
وضحكنا كتار
وسكوتنا ادب
وكلامنا حوار
كضبنا صدق
وصدقنا مزار
ما هامانا غير قعدتنا
وبس شجرتنا
وبمبر حبل
وهبابة خيش
فورة اللبن
وشاي اللبن
ومقنن زين
والناس بتنادي
جبنتي الوين؟
وانا المسكين زي الشرقرق
وجيب الفندق ويد الفندق
وناخد الراس
وناخد التني
وتالت لينا ما بهني
والبن البن
يا ناس قلّني
ونغني نغني
نغني نهوهُ
"انتي تشبهي غير اللبن القبيل حلبوه
لا حمض ولا غلط على الشربوه"
"يا عنكوليب فداسي النقرشو ونقوه
شوفتك ترفع الفوق الفراش مدوه"
ولسه نهوه
 وناس بتعاني
"جعلي ودنقلاوي وشايقي ايه فايداني
غير جعلت خلاف خلت اخوي عاداني"
"خيرنا يعم كتير للقريب والداني
ويكفي النيل ابونا والجنس سوداني"
وقلت اكتب بالحجر فوق الحجر
كلمة غايبة عن الذهن
منقوشة في جوة القلب
كلمة نبتت من بحر
فرهددت بين الزهر
والاندياح والارتياح
 وشاهيوهو قام نص العصر
جبنة وتكية
ونار هدية
وست رضية
وكلك عطر
بخور تيمان
وجور زينين
وكل اتنين بحجوا اتنين
انت و انا
وانت وبراك
ومعاك فلان
والتاية ديك
ومن عيك لعيك
جابني الطريق
لقيت هناك
كباية زينة
وضل رتيلة
وست رزينة
وناس حلوين
ومتناغمين
ومتحابين
ومتلامين
جامعاهم بس
قعدة حلوة
وشاي لذيذ
وجبنتي ديك
و ونستي ديك
وهظار خفيف
وظل رفيف
ولمة حلوة
.
.
ومطر خفيف