هل جربت ...
ولو لي مرة ...
احساس الزول الفجأة بيعشق
دون ما يكون في البال او خاطر ...
انو يلاقي الزول الدايرو ... لو في موقف او في رحلة او في قطر الحب العدا ... او في شارع او في كلمة ... او بين لحظة ... حته و برهة .... او في القلب الامكن نور ... او لو حتى في سكة غربة ... او لو في بال او خاطر ... او في لو حتى في حبة سرحة ...
ودون ما تشعر تبدا بترجف
وتلقى حواسك وكل دواخل ... تبدأ بتهتف ...
امكن جنيت ... او هضربت ... او ده شنو الخلاك ترفرف ....
هل جربت ...؟
انك تعشق ؟؟
هل جربت .. ؟؟
هل جربت احساس الفرحة ...
وانك زي الطفلة ام طرحة ...
تجري تنطط فوق الغيمة وشايل كل الكون في كفة
وشايل العشق الباقي في كفة ...
وترجح كفة عشقك خالص ...
وتبقى بتعشق
هل جربت ...
هل جربت تبدا تقاوم ...
ما تنداح للزول البهتف ...
بنده اسمك ... زي الفرحة ...
تبقى صمود و تجابد نفسك ...
تجلب امنك بدل الضحكة ...
وترجع تنصف ...
ما اظن جربت
طيب
هل جربت انك تبقى الزول الامكن يكون ما انت ...
تعيش لو فترة بسيطة ...
لابس توب الناس السرحت في دنياك يا الحب الظالم داك يا روميو
وانصف قيس و ليلى و عنتر و عبلة
هل جربت ...؟؟
هل جربت تكون درويش في دارة ...
او حولية تجر لسبحتك اللالوبة ... وتطرى الجية ...
عشان ما تعشق ...
ولو ما عشقت ...
تبدا بتكفر ... و تنكر ريدك وتلحد حبك ...
و بس زي فجأة ...
تلقى الزول الممكن يبقى حبيبك خالص
وترجع تاني ... تصلي لي قبرك
وترجع تعشق
هل جربت ...؟؟
هل جربت احساس الزول الراد من غير ما يشعر انو الراد ...
وفجأة ... رجف القلب القفل كل مداخل الريد من صدو .. ونسى في غفلة انو وريدو او شريانو .. ممكن يجلب حب في نبضة .. وفجأة بيعشق
هل جربت الزول الحالم ... كل ما يحلم بلقى حبيبو بيظهر غفلة في نص حلمو ... وببدا يعيش بي لهفة معاهو .. ولمن يصحى يبدا يفتش امكن يلقى سراب لحبيبو ...
ويرجع تاني يقاوم نومو ... ويمكن يرجع تاني و يحلم
وفجأة بيعشق
هل فكرت في لحظة انك تطرى الزول الليهو قليبك ميّل انو قليبو عليك ما ميّل ؟؟
وزي ما ميل ليهو قليبك ... قلبو عليك كمان زاد و كيل... كل العشق والود والريد ... كل الشوق والحب بالطن ... وفجاة بتعشق ..
كم من زول من قبلك جرب ...
ودون ما يشعر ... عاش القصة بنفس الصورة ...
زول من ريدة و زول من حلمة ... زول من لحظة و زول من رجفة ... وزول مسكين ...من غير ما يوعى
ونفس الرحلة ... تبدا معاك من نفس الحتة ...
وتنهي معاك القصة في نفس الحتة
وتبدا بتعشق ...
هل جربت ...؟
ليست هناك تعليقات:
إرسال تعليق